Халықаралық математика олимпиадасының жүлдегерлері елге оралды
Алматы халықаралық әуежайында Қытай Халық Республикасының Шанхай қаласында өткен 67-ші Халықаралық математика олимадасының (IMO-2026) жүлдегерлерін салтанатты қарсы алу рәсімі өтті.
Олимпиада жүлдегерлерін әуежайда ата-аналары, жақындары, достары, ұстаздары және білім саласының өкілдері жылы қарсы алды. Салтанатты рәсім барысында «Дарын» республикалық ғылыми-практикалық орталығының директоры Тимур Давлет Оқу-ағарту министрінің Алғыс хаттарын табыстап, министрдің құттықтау сәлемін жеткізді.
Әлемнің 117 елінен 700-ге жуық үздік жас математик бас қосқан беделді білім додасында Қазақстан құрамасы 3 күміс және 3 қола медаль жеңіп алып, ел қоржынына тағы бір жарқын жеңіс сыйлады.
🥈Тимур Мұрат - Алматы қаласындағы «Haileybury Almaty» халықаралық мектебінің 12-сынып оқушысы;
🥈Әли Еркебұланұлы - Алматы қаласындағы «NURORDA» мектеп-лицейінің 11-сынып оқушысы;
🥈Батырхан Бейғанов - Республикалық физика-математика мектебінің 10-сынып оқушысы.
🥉Ерасыл Алтынбек - Алматы қаласындағы «NURORDA» мектеп-лицейінің 11-сынып оқушысы;
🥉Марғұлан Шарел - Астана қаласындағы Spectrum халықаралық мектебінің 12-сынып оқушысы;
🥉Амирлан Аманжолов - Алматы қаласындағы «Haileybury Almaty» халықаралық мектебінің 12-сынып оқушысы.
Құрама жетекшілері:
Асылбек Әбдіәшімұлы Исахов;
Қанат Қайратұлы Сатылханов.
Халықаралық математика олимпиадасы (IMO) - әлемдегі ең беделді әрі ең күрделі зияткерлік жарыстардың бірі. Биылғы нәтиже қазақстандық жас математиктердің жоғары дайындық деңгейі мен халықаралық білім кеңістігіндегі бәсекеге қабілеттілігін тағы бір мәрте дәлелдеді.
