БАЛАЛЫҚ ШАҚ: СЕНІМ, ҚОЛДАУ ЖӘНЕ ЭМОЦИЯЛЫҚ ТЕПЕ-ТЕҢДІК
Ақтөбе облысы Байғанин ауданының Қ. Жазықов атындағы орта мектебінде «Балалық шақ: эмоция және тепе-теңдік» тақырыбында ата-аналар жиналысы өтті.
Жиынға «JAN AHUAL» психологиялық қолдау орталығының әдіскері Айсұлу Жахина мен психолог Жұлдыз Ибашева қатысып, «Отбасы құндылығы» тақырыбында мазмұнды баяндама жасады. Сонымен қатар ата-аналарға арналған практикалық жаттығулар мен тренингтер өткізіліп, бала тәрбиесіне қатысты пайдалы кеңестер берілді.
Жиналыс барысында өзекті мәселелер талқыланып, ата-аналармен пікір алмасу ұйымдастырылды. Қатысушылар ойларын ортаға салып, тиімді ұсыныстарымен бөлісті.
«Сенім, қолдау және қауіпсіз орта» тақырыбында мектеп әкімшілігі мен педагогтер ұжымына арналған дөңгелек үстел өтті. Іс-шара барысында қауіпсіз психологиялық ортаны қалыптастыру жолдары талқыланып, әдістемелік ұсыныстар берілді.
Сондай-ақ мектеп оқушыларына психолог Жұлдыз Ибашева «Өмір құндылығы — өз қолыңда» тақырыбында арт-терапиялық жұмыс жүргізді.
Білім алушылармен топтық жұмыстар ұйымдастырылып, «Сенімді дос», «Қимылды қайтала» атты тренингтер өткізілді.
Іс-шаралар балалардың эмоциялық саулығын қолдап, отбасылық құндылықтарды нығайтуға және мектепте сенімді әрі қауіпсіз орта қалыптастыруға бағытталды.
