ҚАЗАҚСТАН ЖАҢА МОДЕЛЬГЕ ӨТУДЕ: БАЛА ҚҰҚЫҚТАРЫ МЕМЛЕКЕТТІК САЯСАТТЫҢ НЕГІЗІНЕ АЙНАЛУДА
Алматы қаласында «Бала құқықтары – Жаңа Конституцияның іргетасы» атты республикалық сессия өтті. Іс-шараға сарапшылар, педагогтер және кәсіби қауымдастық өкілдері қатысты.
Негізгі баяндаманы «Өркен» балалардың әл-ауқатын арттыру ұлттық ғылыми-практикалық институтының президенті Елена Николаевна Сакенова жасады. Ол қазіргі таңда Қазақстан баланың әл-ауқаты мен құқықтарын тек декларация ретінде емес, мемлекеттік саясаттың нақты бағытына айналдыратын жаңа жүйелі модельге қадам жасап отырғанын атап өтті.
Талқылаудың басты тақырыбы – конституциялық нормаларды күнделікті тәжірибеге енгізу. Яғни, бала құқықтарын қорғаудың нақты тетіктерін қалыптастыру, мектептерде қауіпсіз әрі қолдаушы орта құру, сондай-ақ бұл үдерістегі педагогтердің рөлін күшейту мәселелері сөз болды.
Қатысушылар өзара тәжірибе алмасып, заманауи тәсілдерді талқылады және бүгіннің өзінде іске асыруға болатын нақты шешімдерді қарастырды. Сонымен қатар, тиімді жүйе қалыптастырудың маңызды шарты ретінде ведомствоаралық өзара іс-қимылға ерекше назар аударылды.
Сессия қорытындысында бұл өзгерістердің тек құжат деңгейінде қалмай, нақты іс жүзінде жүзеге асып жатқандығы айтылды. Қазақстан біртіндеп баланы, оның қауіпсіздігін, дамуын және өмір сапасын басты орынға қоятын жаңа жүйені қалыптастырып келеді.
Сарапшылардың пікірінше, мұндай тәсіл мемлекеттік саясаттың философиясын өзгертіп, оны балалардың нақты қажеттіліктеріне бағытталған жүйеге айналдыруда.
