Америкалық ғалым PhD Саманта Авадпен кездесу
«Өркен» балалардың әл-ауқатын арттыру ұлттық ғылыми-практикалық институты мен Л.Н. Гумилев атындағы Еуразия ұлттық университетінің психология кафедрасы арасындағы ынтымақтастық туралы меморандум аясында 2024 жылғы 15-16 желтоқсан күндері балалар мен жасөспірімдер арасындағы суицидтік мінез-құлықтың алдын алу бойынша психологиялық қолдау орталықтарының қызметкерлеріне арналған екі күндік тренинг өтеді. Тренингке жүргізуші ретінде қатысу үшін Бостон балалар ауруханасы мен Гарвард медициналық мектебінің (АҚШ) жанындағы Жарақаттану және қоғамға төзімділік орталығының (TCRC) ғылыми қызметкері PhD Саманта Авад Астанаға арнайы іс-сапармен келді.
2024 жылғы 13 желтоқсанда PhD докторы Саманта Авад және Л.Н. Гумилев атындағы ЕҰУ психология кафедрасының меңгерушісі Әлия Мамбеталинаның қатысуымен «Өркен» балалардың әл-ауқатын арттыру ұлттық ғылыми-практикалық институтында «Балалар суицидінің алдын алу: пәнаралық көзқарас және балалардың әл-ауқатын қалыптастырудағы төзімділіктің рөлі» тақырыбында тақырыптық кездесу болды. Қатысушылар қазіргі ғылыми деректерді, алдын алу шараларын және осы саладағы табысты тәжірибені талқылады.
Осы күні доктор Саманта Авад №101 жайлы мектепке барып, оқу орнының инновациялық білім беру тәсілдерімен, материалдық-техникалық базасымен танысты, Қазақстан Республикасының Тәуелсіздік күніне арналған оқушылардың мерекелік концерттік бағдарламасын тамашалады. Содан кейін ол этносаралық диалогты нығайтуға бағытталған Достық үйіне барды.
Сапардың соңында доктор Саманта Авад Астана қаласы әкімдігінің Психологиялық қолдау орталығында болып:
- Психологиялық көмек көрсету және әдістемелік жұмыс тәжірибелерімен танысты;
- Тақырыптық пікірталасқа қатысты;
- Ынтымақтастық пен тәжірибе алмасу перспективаларын талқылады.
Бұл сапар халықаралық тәжірибе алмасу және балалардың құқықтары мен әл-ауқатын қорғау саласындағы ынтымақтастықты нығайтудағы маңызды қадам болды.
