650 мыңнан астам ата-ана жаңартылған бағдарлама бойынша оқудан өтті
2023 жылдан бастап «Адал азамат» бағдарламасы аясында еліміздің барлық мектептерінде Ата-аналарды педагогикалық қолдау орталықтары жұмыс істеп келеді.
2026 жылдың басынан бері Ата-аналарды педагогикалық қолдау орталықтарында (АПҚО) 3.0 бағдарламасы бойынша 86 мыңнан астам сабақ өткізілді. Оқу процесі 650 мыңнан астам ата-ананы қамтыды. Ол саналы тәрбиені дамытуға, балалардың психологиялық қауіпсіздігін қамтамасыз етуге және отбасы мен мектептің өзара іс-қимылын нығайтуға бағытталған.
Сабақтардың мазмұны педагогтер мен ата-аналар қауымдастығының ұсыныстарын ескере отырып, жыл сайын жаңартылып отырады. Бағдарламаға бала тәрбиесіндегі отбасының рөлін күшейтуге және сенімді қарым-қатынасты қалыптастыруға бағытталған практикалық тақырыптар мен әкелердің қатысуымен өтетін мектеп іс-шаралары енгізілген.
АПҚО 3.0 жаңартылған бағдарламасы модульдік принцип бойынша құрылған және үш бағытты қамтиды:
* Эмоционалды тұрақтылықты және ата-аналық сенімділікті дамыту;
* Бала үшін қауіпсіз орта қалыптастыру;
* Ерекше білім беру қажеттіліктері бар балаларды тәрбиелеп отырған отбасыларға педагогикалық қолдау көрсету.
Мұндай тәсіл балалардың жас, психологиялық және әлеуметтік ерекшеліктерін ескеруге, сондай-ақ отбасылармен жүйелі жұмыс жүргізуге мүмкіндік береді.
Сабақтарды арнайы дайындықтан өткен педагогттер мен психологтар жүргізеді. Ата-аналар сенімді қарым-қатынас орнату, қауіп-қатерлердің алдын алу және баламен эмоционалды байланысты нығайту бойынша ұсыныстар алады. Ересектердің жеке үлгісі мен балалардың қауіпсіздігін қамтамасыз етуге қатысты тақырыптар үлкен қызығушылық тудыруда.
Сауалнама қорытындысы
Сауалнама қорытындысы бойынша ата-аналардың басым бөлігі тәрбие процесіне белсене араласа бастағанын атап өтті:
* 73,9% ата-ана балаларымен күн сайын сөйлеседі;
* 89,6% баланың қиындықтарына жедел әрекет етеді;
* 78% балаларының араласатын ортасын жақсы біледі;
* Әрбір екінші ата-ана тәрбие тәсілдерін қайта қарауға дайын;
* 62% алған білімдерін күнделікті тәрбие тәжірибесінде қолдануды жоспарлап отыр.
Орталықтар мектеп пен отбасы арасындағы ашық диалогтың тиімді алаңына айналып, ата-аналарға білім алуға, қолдауға және бала тәрбиесі мен дамуының практикалық құралдарына қол жеткізуге мүмкіндік берді.
